Holmedal montessoriskule

Foto: Eirin Hegrenesall-rights-reserved

Holmedal montessoriskule ligg i bygda Holmedal, ca. 8 km frå Askvoll sentrum

Plassering i kart

Skulen
Holmedal montessoriskule er ein privat barneskule som ligg i Holmedal i Askvoll kommune. Undervisninga er basert på Maria Montessori sine prinsipp og metodar. Skulen vart starta i august 2005, då den offentlege skulen vart nedlagt. Elevane på skulen er delt inn i to grupper, 1. – 3. klasse og 4. – 7. klasse. Alle lærarane ved skulen er utdanna montessoripedagogar.

Skuledagen
Skuledagen startar 8.45 og då samlar elevane seg i gruppa si, på teppet i klasserommet. Her vert det gjennomgått kva som skal skje i løpet av dagen. Dagen er delt inn i to lange arbeidsøkter, frå kl. 8.45 – 11.15 og 12.30 – 14.30. I arbeidsøktene arbeider elevane med oppgåver dei har fått presentert.

Innhald i arbeidsøktene
Elevane har ein arbeidsplan å forholde seg til, og kan sjølve bestemme kva dei vil arbeide med på planen. På denne måten har dei fridom til å organisere arbeidet sitt sjølv. I den første arbeidsøkta arbeider elevane med praktiske og teoretiske oppgåver. Det er lagt opp til lange arbeidsøkter, for at elevane skal kunne finne den djupe konsentrasjonen, utan å verte avbrutt av friminutt. I den andre arbeidsøkta, er det i tillegg til framhald av arbeidsoppgåver, lagt inn praktisk/estetiske fag som mat og helse, kunst og handverk, musikk og kroppsøving.

Konkretiseringsmateriell i arbeidet
Ein viktig del i arbeidsøktene er konkretiseringsmateriellet elevane brukar. Dei første åra brukar elevane mykje sensorisk materiell som skal hjelpe dei over i meir abstrakt tenking. Elevane brukar ulike materiell frå 1. – 7. klasse. Spesielt i matematikk er det utarbeidd mykje materiell, som elevane på skulen brukar. I tillegg til dette utarbeider lærarane materiell i alle fag. Alle materiella har ein kontroll, slik at elevane sjølv kan finne sine eigne feil, og korrigere desse. Dette hjelper elevane til å bli sjølvstendige.

Ynskjer du å sjå ein kort introduksjonsfilm om montessorimateriell, klikk her. (Filmen er amerikansk)

Ein lang pause
I den lange pausen midt på dagen, frå klokka 11.15 – 12.30 samlar alle elevane på skulen seg, på kjøkkenet, til felles lunsj. Etter mat får elevane vere ute, og i gymsalen. På uteområdet kan elevane spele ulike ballspel i ballbingen, leike i naturområdet på baksida av skulen og elles andre frileik-aktivitetar.

Orden og ansvar
Orden er ein viktig del i miljøet på skulen. Alle ting har faste plassar, og klasseromma er inndelt etter fag og tema. Elevane har ansvar for å halde orden, og alle har faste oppgåver å utføre.

Kort film: Maria Montessori – Her life and Legacy.

Ynskjer du å vite meir om skulen eller om montessoripedagogikken, kan lenkjene nederst på sida nyttast.

Holmedal montessoriskule av Eirin Hegrenes er lisensiert under ein Creative Commons Namngjeving-Ikkje-kommersiell 4.0 internasjonal lisens.