Bøheia – grei skogstur

Foto: Håkon Haukøycbn

Turgåarar møtest på Bøheia og skriv seg inn i trimboka.

Plassering i kart

Klar til start

Byggjefeltet i Ytre Bø er eit greitt utgangspunkt for turen; her er det og lett å finne parkeringsplass om du kjem med bil. No er du alt om lag 50 meter over havet og har ei stigning på 300 meter før du er på toppen. For ein vanleg turgåar vil turen opp og ned vere unnagjort på ein til to timar.

I all slags ver

Stien mot Bøheia går hovudsakleg gjennom skogsterreng; berre heilt oppe er lendet noko opnare; difor er det mange som tek denne turen når det regnar og bles, for her tek ikkje vindkulene så hardt. Undervegs har ein altså ikkje det store utsynet, men då får ein heller konsentrere seg om dei mange detaljar skaparverket har å by på.

Mot toppen

Først vel halvveges møter du på nokre brattkneikar; dei er slett ikkje lange, men greie nok for den som tek turen som ei treningsøkt og likar å sveitte litt. Bøheia dukkar ikkje opp framfor deg som noko storfelt, men som namnet fortel: ei hei i landskapet. Like under toppen ligg Mørketjønna; skikkeleg idyllisk i vårmorgonen eller ved solefall sommardagen.

Utsyn alle leier

På toppen står du altså 350 meter over havet. Småskogen står heller tett kring deg, men små kollar rundt ikring gjev deg fine utsiktspunkt 360 grader rundt. Du kan studere Sognesjøen, Sognneskollen og Solund i vest; vidare nordover ligg mange av dei andre turmåla i Hyllestad: Lifjellet, Kolgrovheia, toppane over Sørbøvåg og Hesjetinden. Ja, skal du først på Bøheia, så ta med deg kikkart og fotoapparat.
God tur !

Bøheia – grei skogstur av Håkon Magnus Haukøy er lisensiert under ein Creative Commons Namngjeving-Ikkje-kommersiell 4.0 internasjonal lisens.