Laviksåta – ligg lagleg til

Foto: Håkon Haukøycbn

Ved varden

Plassering i kart

Frå riksvegen over Lavikdalen

Ruta frå Trongan er den absolutt snaraste vegen til Laviksåta. Utgangspunktet ligg ved riksvegen over Lavikdalen like før du når høgste punktet frå Laviksida. Her er grei parkeringsplass og skilt som viser veg. Lavik IL har merka stien, og her som andre stader dei har påteke seg merking, har dei gjort framifrå arbeid. Like etter start passerer du Lavikstølen, og så ber det oppover brattlendet.

Tøff start

Første halvdel av vegen mot toppen er heller tung. Bakkane er bratte, og underlaget tappar krefter. Etter 10- 20 minuttars gange ser du allereie dalen djupt under deg. Men godt halvvegs oppe endrar terrenget seg. Det flatar ut; hei og vidder ligg framfor deg, og du har utsyn innover Sognefjorden og vestover Åfjorden mot Lifjellet, Alden og øyriket utafor.

Ved varden

Ein ekte fjelltrimmar vil nok vere ved varden etter 30 ? 40 minutt. Idrettslaga i Hyllestad og Lavik har fjelltrimbøker liggjande der, og dei vitnar om jamleg besøk året rundt. Ja, faktisk er det dei som gjennom året passerer minst 100 turar til topps. Legg merke til det vel forseggjorde arbeidet til dei som har reist dette landemerke.

Vegen vidare

Så er det å bestemme seg: går turen rake vegen ned att til Trongane, eller er Laviksåta berre eit delmål for turen. I alle høve har du no eit framifrå utgangspunkt for vidare vandring vestover mot Sauesnuken, Heggebøstølen eller Hellebøstølen, eller ned til Basteskaret og mot Handalsstølane.
Legg du vegen mot Laviksåta, så planlegg gjerne litt, for då kan du få nokre fine timar i fjellet.

Laviksåta – ligg lagleg til av Håkon Magnus Haukøy er lisensiert under ein Creative Commons Namngjeving-Ikkje-kommersiell 4.0 internasjonal lisens.